ديوان الشاعر / متعب التركي ..

[ثابت الخطوه]

أخواني أخواتي الأعضاء


صباحكم شعر ومسائكم سعاده

سوف أبدأ بنقل الشاعر العذب المميز / متعب التركي

أتمنى أن ينال أعجابكم







قالوا حبيبك يسمع الشعر قلت أيه
.. .. .. .. .. .. .. .. .. .. .. .. .. .. يقـراه بعيونـي قبـل تسمعونـه

لولاه حتى طاري الشعر ما ابيـه
.. .. .. .. .. .. .. .. .. .. .. .. .. .. مير أكتبه من شان خاطر عيونـه

هو روح شعري وأمنياته وماضيه
.. .. .. .. .. .. .. .. .. .. .. .. .. .. جذع الشجر وش كان لولا غصونه

اكتب لغيره والقصايد تجـي فيـه
.. .. .. .. .. .. .. .. .. .. .. .. .. .. كن القصايد حالفـه مـا تخونـه

هذاك لا منه زعل قمـت أهاديـه
.. .. .. .. .. .. .. .. .. .. .. .. .. .. حتى وهو مخطي تعـذرت دونـه

يمكن لو أنه يلمس الجرح بيديـه
.. .. .. .. .. .. .. .. .. .. .. .. .. .. يستغرب ان اللي لمسهـا طعونـه

ابطى وهو غايب وزلت حراويـه
.. .. .. .. .. .. .. .. .. .. .. .. .. .. وأنا من العـام آتحـرى مزونـه

هو مادرى اني في غيابه محاتيـه
.. .. .. .. .. .. .. .. .. .. .. .. .. .. ليته نشد عن حالي اللـي يجونـه

وا قلبي اللي توه أفلـت عراويـه
.. .. .. .. .. .. .. .. .. .. .. .. .. .. كيف انسرق وضلوع قلبي حصونه

عجزت أرده كان مانـي براعيـه
.. .. .. .. .. .. .. .. .. .. .. .. .. .. يوم انتثر شوقه وهاضت شجونـه

يبسن عروقي لكن اللـي يعزيـه
.. .. .. .. .. .. .. .. .. .. .. .. .. .. ان اكثـر العالـم تـردد لحونـه

خافو من الله لا تجيبـون طاريـه
.. .. .. .. .. .. .. .. .. .. .. .. .. .. لا صرت أنا موجـود لا تذكرونـه

لو كـل غالـي جابـه الله لغاليـه
.. .. .. .. .. .. .. .. .. .. .. .. .. .. ما شفت لك مخلوق تبكي عيونـه






ياليت ما أحد يرد حتى يكتمل الديوان

[ثابت الخطوه]

يوم طاب السهر عيت تطيـب النفـوس
.. .. .. .. .. .. .. .. .. .. .. .. .. .. .. جت من الله وانا كـم كنـت محتاجهـا

كنها مـن حلاهـا كـل ليلـه عـروس
.. .. .. .. .. .. .. .. .. .. .. .. .. .. .. خايفه مـن عيـون النـاس واحراجهـا

حي هالطول يـا زولٍ عسـاه محـروس
.. .. .. .. .. .. .. .. .. .. .. .. .. .. .. مـن عبـث لوعـة الايـام وازعاجهـا

تزعل نفوس ولا تمتلـي غيـض روس
.. .. .. .. .. .. .. .. .. .. .. .. .. .. .. من يقـرب لهـا وضلوعـي سياجهـا

لي متى وانت يا شوق القلوب محبـوس
.. .. .. .. .. .. .. .. .. .. .. .. .. .. .. طالـت السالفـه وابطيـت بعلاجـهـا

جعل قلب ٍ على نـار الغيـاب محمـوس
.. .. .. .. .. .. .. .. .. .. .. .. .. .. .. يحتـرق بيـن صاليـهـا ووهاجـهـا

من خبر له غلا بين الضلوع مغـروس
.. .. .. .. .. .. .. .. .. .. .. .. .. .. .. غرسةٍ كل ابـو شعـري مـن انتاجهـا

لا تقرب لك الفرقـا هذيـك الهجـوس
.. .. .. .. .. .. .. .. .. .. .. .. .. .. .. من متـى والبحـور تفـارق امواجهـا

لازم اصبر على وجه الزمـان العبـوس
.. .. .. .. .. .. .. .. .. .. .. .. .. .. .. لين سـود الليالـي يضحـك احجاجهـا

من بغى يقطع الفرجه يعـاف الجلـوس
.. .. .. .. .. .. .. .. .. .. .. .. .. .. .. ليـن ياصـل نهايتـهـا ومخراجـهـا

كان شعري قصر ما طال شمس الشموس
.. .. .. .. .. .. .. .. .. .. .. .. .. .. .. تستريـح القصايـد داخـل ادراجـهـا

[ثابت الخطوه]

توديع الأحباب مثل الموت له سكره
.. .. .. .. .. .. .. .. .. .. .. .. .. .. أدمى جروحي وشق الصـدر منيّـا

والقلب طير ضلوع الآدمي وكـره
.. .. .. .. .. .. .. .. .. .. .. .. .. .. لاشاقـه الطلـع لا سلّـم ولاحيّـا

مصير الأحزان تنسانـي وتفتكـره
.. .. .. .. .. .. .. .. .. .. .. .. .. .. ما كل الأيام بيض وسمحـة محيّـا

قل غيرها ما أنت لا مجبر ولا مكره
.. .. .. .. .. .. .. .. .. .. .. .. .. .. لا صار ما لي غلا ما أبي لك حميّا

لو في يدي شي ما قلت الوعد بكره
.. .. .. .. .. .. .. .. .. .. .. .. .. .. حزمت حدب الضلوع وقلت لك هيّا

لو كل غالي يجي دايم على ذكـره
.. .. .. .. .. .. .. .. .. .. .. .. .. .. ما صرت اشوفك هناك وحبك هنيّا

يا ليتني لابغيت اكره قدرت اكـره
.. .. .. .. .. .. .. .. .. .. .. .. .. .. ما كان قلبي ليا جيت اكرهك عيّـا

ما دامك معيف رح لكن على فكـره
.. .. .. .. .. .. .. .. .. .. .. .. .. .. ما قلت لي ليه دمعـك سـال منيّـا

[ثابت الخطوه]

البارحة مدري وش اللـي خذانـي
.. .. .. .. .. .. .. .. .. .. .. .. .. .. يوم اجنبوا عني من الضيقة اشملت

جيـت أتكلـم بـس عيـا لسانـي
.. .. .. .. .. .. .. .. .. .. .. .. .. .. ما كني إلا مرتكب ذنـب واخملـت

الله يسامح مـن ذكـرت ونسانـي
.. .. .. .. .. .. .. .. .. .. .. .. .. .. وأنا أدري إنـي لاذكرتـه تجملـت

عانيت وأدري كـل طيـب يعانـي
.. .. .. .. .. .. .. .. .. .. .. .. .. .. وعلى حساب طعوني الخضر جاملت

يا ما خذوا مني ولا احد ٍ عطانـي
.. .. .. .. .. .. .. .. .. .. .. .. .. .. من طيبتي في حق نفسي تساهلـت

عـزاي لامنـه تجهـم زمـانـي
.. .. .. .. .. .. .. .. .. .. .. .. .. .. يممت وجهـي للكريـم وتوسلـت

واللي يبي قربـي وبعـدي لقانـي
.. .. .. .. .. .. .. .. .. .. .. .. .. .. أمشي على وضح النقاء ما تختلت

يا من سكنت اجمل زوايـا كيانـي
.. .. .. .. .. .. .. .. .. .. .. .. .. .. ياما على نفسي عشانك تحاملـت

مرات احس انك معي شخص ثاني
.. .. .. .. .. .. .. .. .. .. .. .. .. .. ومرات احس انك حبيبي وما زلـت

لاتفرح انك دجـت بيـن المحانـي
.. .. .. .. .. .. .. .. .. .. .. .. .. .. لو ما تخون الذاكـره مـا تسللـت

عشان ماضيك الجميـل وعشانـي
.. .. .. .. .. .. .. .. .. .. .. .. .. .. حاول تشيل من الوفا ربع ماشلـت

ماني على خبـرك حبيبـي ترانـي
.. .. .. .. .. .. .. .. .. .. .. .. .. .. حتى عن صغار الامانـي تنازلـت

[ثابت الخطوه]

ليـه وطيـت عـن خيـل السـروج
.. .. .. .. .. .. .. .. .. .. .. .. .. .. ليه مديـت عقـب القـراح الهمـاج

لا تجمّل لي الغلطات والعـوج عـوج
.. .. .. .. .. .. .. .. .. .. .. .. .. .. يضحك احجاج او ينعقد لـي حجـاج

اصبر اشوي وش علمك تهوج وتموج
.. .. .. .. .. .. .. .. .. .. .. .. .. .. ميت القلب مثلك ما يعـرف الهيـاج

ما تعودت اجامـل معتليـن البـروج
.. .. .. .. .. .. .. .. .. .. .. .. .. .. الزم العلم قبل يصير هرجـك سمـاج

المشاعر تجي مثل المعاصيـر هـوج
.. .. .. .. .. .. .. .. .. .. .. .. .. .. وأنت مالك على هوج الرياح احتجاج

جيت وقلوب حسادي تميـل وتـروج
.. .. .. .. .. .. .. .. .. .. .. .. .. .. لا صفى جوهم ساعه قفـاه العجـاح

ابتسم لك وهمي فـوج يقفـاه فـوج
.. .. .. .. .. .. .. .. .. .. .. .. .. .. من يحبك لزوم يصير مثلـك هجـاج

بس قلي وأنا غلطان لـك ومحجـوج
.. .. .. .. .. .. .. .. .. .. .. .. .. .. وين يلقون لجروح النواعس عـلاج

القمر غاب وانت اطفيت نور السروج
.. .. .. .. .. .. .. .. .. .. .. .. .. .. قلت يكفيك نور الوجه الاصبح سراج

كن بين الضلوع العوج صفقات مـوج
.. .. .. .. .. .. .. .. .. .. .. .. .. .. يوم فاض الغلا والشوق والقلب هـاج

ضيقة الصدر لو بين المحاني تلـوج
.. .. .. .. .. .. .. .. .. .. .. .. .. .. كل ضيقة لها عنـد الكريـم انفـراج

ما هو الغيض سبة كل ابو هالهـروج
.. .. .. .. .. .. .. .. .. .. .. .. .. .. بس ما لي على بعض السوالف مزاج

[ثابت الخطوه]

قبل اسافر وتنسى جيت اسلـم عليـك
.. .. .. .. .. .. .. .. .. .. .. .. .. .. جيت ابي عمري اللي من يديني غـدى

ضاعت اجمل سنيني من عمايل يديـك
.. .. .. .. .. .. .. .. .. .. .. .. .. .. اكذب ان قلت راحت لاجل عينك فـدى

فرصة العمر قالوا لا غدت مـا تجيـك
.. .. .. .. .. .. .. .. .. .. .. .. .. .. جتني اكثر فرص عمري وضاعت سدى

جرب الخوف مره حـس بـه يعتريـك
.. .. .. .. .. .. .. .. .. .. .. .. .. .. وارفع الصوت ما تسمع لصوتك صدى

تدري اللي ذبحني قولتـك مـا ابيـك
.. .. .. .. .. .. .. .. .. .. .. .. .. .. ما بقالـي لــ ثـاري لـو بغيتـه مـدى

ما هقيـت المشاعـر كلهـا ترتجيـك
.. .. .. .. .. .. .. .. .. .. .. .. .. .. قل لها بالمفـارق منهـو اللـي بـدى

هاك دمعـة عيـون ٍ باكيـه تشتكيـك
.. .. .. .. .. .. .. .. .. .. .. .. .. .. هاك ريّح ضمير ٍ ما استـراح وهـدى

ما تناظر عيونـي زول هـذي وذيـك
.. .. .. .. .. .. .. .. .. .. .. .. .. .. ما يهز المسامـع اسـم ريـم وهـدى

قلت ما عادلي رغبـة وشوفـات فيـك
.. .. .. .. .. .. .. .. .. .. .. .. .. .. قلت يا نفس طيبـي يفرحـون العـدى

قلت عايف ونفسـي بالخفـا تشتهيـك
.. .. .. .. .. .. .. .. .. .. .. .. .. .. عزة النفس تدري طيب ما هـي ردى

خل عينك تهـل دموعهـا وش عليـك
.. .. .. .. .. .. .. .. .. .. .. .. .. .. أنت خدك ورود ودمـع عينـك نـدى

[ثابت الخطوه]

ضايق البال ما يستانس الحالـه
.. .. .. .. .. .. .. .. .. .. .. .. .. .. وانت لاغبت عني كني الحالـي

جتك الاشواق رجليّـه وخيالـه
.. .. .. .. .. .. .. .. .. .. .. .. .. .. غير الاول تحمّل شوقي التالـي

ليت من قال متعب خابت امالـه
.. .. .. .. .. .. .. .. .. .. .. .. .. .. شاف بعيونك الخدرات منزالـي

واحد ٍ فيك ما هو منشغـل بالـه
.. .. .. .. .. .. .. .. .. .. .. .. .. .. اشهد انه بها الدنيا هو السالـي

راوي العود يزهالـك وتزهالـه
.. .. .. .. .. .. .. .. .. .. .. .. .. .. عاد من يقدر يلومه إليـا مالـي

صاحبي والقصايد فيـك مختالـه
.. .. .. .. .. .. .. .. .. .. .. .. .. .. وأنت لك حق فيهن يوم تختالـي

دام نفسك لحـب الشعـر ميالـه
.. .. .. .. .. .. .. .. .. .. .. .. .. .. ليه ما صير شاعر وانت في بالي

من تمناك لا تنشد عن احوالـه
.. .. .. .. .. .. .. .. .. .. .. .. .. .. كيف عقب العسل يستطعم الحالي

عقبك النفس مذعوره ومهتالـه
.. .. .. .. .. .. .. .. .. .. .. .. .. .. سود الايام هزت برجي العالـي

لكن القلب من يمك علـى حالـه
.. .. .. .. .. .. .. .. .. .. .. .. .. .. في تناسيك ليه اكذب على حالي

قلت لك نعمة النسيـان زوالـه
.. .. .. .. .. .. .. .. .. .. .. .. .. .. ذكرياتك بعضهـا قـام يبرالـي

كل ما مرني طيفك علـى فالـه
.. .. .. .. .. .. .. .. .. .. .. .. .. .. قلت يا مرحبا في ريحة الغالـي

شلت همك وهمي ماحـد ٍ شالـه
.. .. .. .. .. .. .. .. .. .. .. .. .. .. كن قلبك غدى يا صاحبي خالـي

إبتعدنا وكـل ٍ راح فـي حالـه
.. .. .. .. .. .. .. .. .. .. .. .. .. .. بين هالناس لكن كنـي الحالـي

[ثابت الخطوه]

يا سعود لا تنشد ترى مانـي مجيـب
.. .. .. .. .. .. .. .. .. .. .. .. .. .. خل الذي خافي لـه شهـور.. خافـي

إن شفتني مغتاظ.. لي حق و مصيـب
.. .. .. .. .. .. .. .. .. .. .. .. .. .. يا سعـود مزعلنـي جديـد اكتشافـي

الغالي اللي كـان مـن قلبـي قريـب
.. .. .. .. .. .. .. .. .. .. .. .. .. .. بيني و بينه.. صـار مثـل التجافـي

إن قلـت زلـه.. مثلنـا زلتـه عيـب
.. .. .. .. .. .. .. .. .. .. .. .. .. .. من قال لك شمس الضحى مـا تشافـي

إن قلت هقوه.. يمكن تصيب و تخيـب
.. .. .. .. .. .. .. .. .. .. .. .. .. .. كم لي سنه .. ما شفت فيـه اختلافـي

و إن صار في نفسه بعض شكة و ريب
.. .. .. .. .. .. .. .. .. .. .. .. .. .. حتى البحر ما هو على طـول صافـي

صرنا من الصده .. سوات المصاويب
.. .. .. .. .. .. .. .. .. .. .. .. .. .. كلن نقـل جرحـه و قـال : امتعافـي

أصعب فراق.. فراق عكف الأشانيـب
.. .. .. .. .. .. .. .. .. .. .. .. .. .. مـا هـو مفـارق لابسـات الغدافـي

و الذيب لا منه عوى.. جاوبـه ذيـب
.. .. .. .. .. .. .. .. .. .. .. .. .. .. و العلم حامض.. بس وين الأشافـي ؟

دامه لقى لـه غيـر قلبـي معازيـب
.. .. .. .. .. .. .. .. .. .. .. .. .. .. الله يسمـح درب هــاك السنـافـي

يروح.. لا يرجي رسـول و مكاتيـب
.. .. .. .. .. .. .. .. .. .. .. .. .. .. هو خابر إنـي.. مـا اتلفـت خلافـي

واللـي تعـلا فـوق روس المراقيـب
.. .. .. .. .. .. .. .. .. .. .. .. .. .. أكيـد مـا تسفـى عليـه السـوافـي

رح بشر اللي شـال شلفـا تريحيـب
.. .. .. .. .. .. .. .. .. .. .. .. .. .. قلـه : تـراهـا كلبـوهـا عـوافـي

اليوم نفسي طابـت.. و باكـر يطيـب
.. .. .. .. .. .. .. .. .. .. .. .. .. .. جرحي.. لو انه مـن يديـن المشافـي

خلصت.. و الدنيا دروس و تجاريـب
.. .. .. .. .. .. .. .. .. .. .. .. .. .. سجل يـا بـو عبدالعزيـز اعترافـي

[ثابت الخطوه]

يا وسيع البـال .. ضيقـت الصـدور
.. .. .. .. .. .. .. .. .. .. .. .. .. .. رحت ما علمتني وين انـت سـاري ؟

في غيابك.. مـا لخلـق الله حضـور
.. .. .. .. .. .. .. .. .. .. .. .. .. .. وفي حضورك.. مالهم بالبال طـاري

ليـه مـا تختـال يـا بـدر البـدور
.. .. .. .. .. .. .. .. .. .. .. .. .. .. و القصايد لك وصيفـات و جـواري

لـك بنـات الفكـر ربـات الخـدور
.. .. .. .. .. .. .. .. .. .. .. .. .. .. يكشفن الثامهن.. و الجـرح عـاري

جعل قلـب مـا مـلاه الصـدق نـور
.. .. .. .. .. .. .. .. .. .. .. .. .. .. عند وجه الريح.. ما يلقـى مـزاري

التغاضـي عجـز لا طـال القصـور
.. .. .. .. .. .. .. .. .. .. .. .. .. .. ليه أداري؟.. و انت عني منت داري ؟؟

الزمـان قصيـر .. والدنيـا تــدور
.. .. .. .. .. .. .. .. .. .. .. .. .. .. كل يوم يضيـق فـي عينـي مـداري

صاحبي محتاج لـك شعـر و شعـور
.. .. .. .. .. .. .. .. .. .. .. .. .. .. و إحتياجي شي.. ما كـان إختيـاري

من متى و الغصـن يختـار الطيـور ؟
.. .. .. .. .. .. .. .. .. .. .. .. .. .. من متى و البـال يختـار الطـواري ؟

لا تسمي صمتـي البـارح .. غـرور
.. .. .. .. .. .. .. .. .. .. .. .. .. .. إنكساري خلف هالصمـت امتـواري

في غياب الشمس وش ذنب الزهـور ؟
.. .. .. .. .. .. .. .. .. .. .. .. .. .. و المطر لا شح وش ذنب الصحاري ؟

اللقـا لحظـات و الغيـبـه شـهـور
.. .. .. .. .. .. .. .. .. .. .. .. .. .. تقصر الخطوات و يطـول انتظـاري

لو قريـت المنكتـب بيـن السطـور
.. .. .. .. .. .. .. .. .. .. .. .. .. .. ما كتبـت لغلطـة العمـر اعتـذاري

صمت هالمينا.. مثل صمـت القبـور
.. .. .. .. .. .. .. .. .. .. .. .. .. .. ما رسى مركب.. ولا لاحت صـواري

[ثابت الخطوه]

كل حاجه طعمها مـرّ فـي هـذا الزمـان
.. .. .. .. .. .. .. .. .. .. .. .. .. .. هـم هالدنيـا و حنٌـا نعيـش لهمـهـا

المكان اللي عرفنـاه مـا عـاد المكـان
.. .. .. .. .. .. .. .. .. .. .. .. .. .. و القلوب.. أحـداث الأيـام زادت غمهـا

صاحبي حتى أنت ما عاد تستاهـل حنـان
.. .. .. .. .. .. .. .. .. .. .. .. .. .. أنت بعثـرت المشاويـر و انـت تلمهـا

البكى في مثل هالحال نـوع مـن الهـوان
.. .. .. .. .. .. .. .. .. .. .. .. .. .. و المهونـه كـل رجـال حـر يذمـهـا

صاحبي.. لو كان للناس و الدنيـا أمـان
.. .. .. .. .. .. .. .. .. .. .. .. .. .. ما تمـوت ورود الأحـلام قبـل نشمهـا

خل عنك علوم الأحباب .. واللي كان كان
.. .. .. .. .. .. .. .. .. .. .. .. .. .. انتهت..وسيـرة الأشـواق مانـي يمهـا

كل ما تظما لياليك قمـت اكتـب عشـان
.. .. .. .. .. .. .. .. .. .. .. .. .. .. تنزف جروحـي والايـام تشـرب دمهـا

الكلام الموحش يخـاف نـور الشمعـدان
.. .. .. .. .. .. .. .. .. .. .. .. .. .. تحتـرق أسمـى معانيـه قبـل يضمهـا

من زمان أكتب على شان تقرا.. من زمان
.. .. .. .. .. .. .. .. .. .. .. .. .. .. بس ما شفـت المكاتيـب جابـت همهـا

[ثابت الخطوه]

ما هو خطأ عشـان ادور معاذيـر
.. .. .. .. .. .. .. .. .. .. .. .. .. .. ولا هو غلط عشان ادور صوابـه

اليوم توه عود لـو كـره الطيـر
.. .. .. .. .. .. .. .. .. .. .. .. .. .. واصبح يشوف العالم اكثر رحابـه

مستغربين انه ملى قلبـي الخيـر
.. .. .. .. .. .. .. .. .. .. .. .. .. .. ليه الغرابة ! وين وجـه الغرابـة ؟

تعبـت ادور للخطـاوي مشاويـر
.. .. .. .. .. .. .. .. .. .. .. .. .. .. ليـن التعـب زاد الليالـي رتابـة

يبكي فرح من شاف بعض التباشير
.. .. .. .. .. .. .. .. .. .. .. .. .. .. معـذور لـو دمعـه يبلـل ثيابـة

من كنت بأول خامسة طفل صغيـر
.. .. .. .. .. .. .. .. .. .. .. .. .. .. كنت امتلي حزن وغموض وكأبـه

كنت أشعر اني غير والمدرسه غير
.. .. .. .. .. .. .. .. .. .. .. .. .. .. هيمان في جو النبـي والصحابـة

كنت ألمح بوجـه الليالـي تعابيـر
.. .. .. .. .. .. .. .. .. .. .. .. .. .. وأقرأ همومي قبل أعرف الكتابـة

والشعر غاااب وله محبة وتقديـر
.. .. .. .. .. .. .. .. .. .. .. .. .. .. اول غيابـه شلـت هـم لغيـابـه

بالنفس كان لبعض هالأمر تأثيـر
.. .. .. .. .. .. .. .. .. .. .. .. .. .. والليلة اهون من جنـاح الذبابـه

[ثابت الخطوه]

مفتوح باب الرجى لو هب مليون ريـح
.. .. .. .. .. .. .. .. .. .. .. .. .. .. والريح ما تاخذ الغرسه مـن عروقهـا

القوس مكسور والرامي يقـوم ويطيـح
.. .. .. .. .. .. .. .. .. .. .. .. .. .. والسهـم منعـاج والايـام خازوقـهـا

لو لبسو ساقط الهرجه ثيـاب المديـح
.. .. .. .. .. .. .. .. .. .. .. .. .. .. قلنـا سحابـة وبلـة يابـس حلوقهـا

يا حادي الركب لا تودّه عليه وتصيـح
.. .. .. .. .. .. .. .. .. .. .. .. .. .. ما عاد هي سالفـة ليلـى ومعشوقهـا

مديت شوفي وشفت الكون رحب وفسيح
.. .. .. .. .. .. .. .. .. .. .. .. .. .. والارض حدر المواطي والسمـا فوقهـا

ما دام عين الرضا ما ها هماج وشحيح
.. .. .. .. .. .. .. .. .. .. .. .. .. .. ابتبـع الغيمـة اللـي رفـة بروقـهـا

مدري عن المقبلة لكن عسى الله يبيـح
.. .. .. .. .. .. .. .. .. .. .. .. .. .. اللي تهـز القلـوب وهزنـي شوقهـا

غنيت للحب ولسـان المحبـة فصيـح
.. .. .. .. .. .. .. .. .. .. .. .. .. .. والبدو سبـة غناهـا ضيقـة خلوقهـا

باكر يروح الشتاء والثلج قصره يسيـح
.. .. .. .. .. .. .. .. .. .. .. .. .. .. ما يفضح الثلج غير الشمس وشروقهـا

[ثابت الخطوه]

الموت هيـن البـلا وش ورى المـوت
.. .. .. .. .. .. .. .. .. .. .. .. .. .. عند الحسـاب يهـون سهـم المنايـا

باكر نموت وتصبـح قبورنـا بيـوت
.. .. .. .. .. .. .. .. .. .. .. .. .. .. وعقـب القصـور بضيقـات الزوايـا

في جوف الارض وكل من حولك سكوت
.. .. .. .. .. .. .. .. .. .. .. .. .. .. وتعاقبـن بالقبـر عــوج الحنـايـا

يا رب يا منجـي نبيـك مـن المـوت
.. .. .. .. .. .. .. .. .. .. .. .. .. .. سترك وعفوك يـوم كشـف الخفايـا

باكر اليا جينا علـى داعـي الصـوت
.. .. .. .. .. .. .. .. .. .. .. .. .. .. شيبـان واطفـال وشبـاب وصبـايـا

ندعـي وحنـا بيـن باكـي ومبهـوت
.. .. .. .. .. .. .. .. .. .. .. .. .. .. ورحنـا لهـا ننقـاد مثـل السبـايـا

يا رب تهدينـي قبـل لحظـة الفـوت
.. .. .. .. .. .. .. .. .. .. .. .. .. .. وتغفـر ذنوبـي يـا كريـم العطـايـا

اشكيك هـم داخـل الصـدر مكبـوت
.. .. .. .. .. .. .. .. .. .. .. .. .. .. وأيامـي الــي بالخطـايـا مـلايـا

أن لاذ بك من كـان طايـع ومبخـوت
.. .. .. .. .. .. .. .. .. .. .. .. .. .. فـي مـن يلـوذ المرتكـب للخطايـا

يا رب يا قـادر علـى كـل طاغـوت
.. .. .. .. .. .. .. .. .. .. .. .. .. .. لا ياقـف اللـي وحـدوبـك خـزايـا

رحماك لامنـا صحينـا مـن المـوت
.. .. .. .. .. .. .. .. .. .. .. .. .. .. واليـا وقفنـا عنـد بابـك عـرايـا

[ثابت الخطوه]

نسيتني علمنـي شلـون ابنسـاك
.. .. .. .. .. .. .. .. .. .. .. .. .. .. في هالزمن نسيان الاحباب عـادي

وشلون لامرت على البـال ذكـراك
.. .. .. .. .. .. .. .. .. .. .. .. .. .. وطيفك سرق مني لذيـذ الرقـادي

وشلون لا قالوا لي الناس وش جاك
.. .. .. .. .. .. .. .. .. .. .. .. .. .. من كنت في لـذة منامـك تنـادي

وشلون اعيش اللي بقالـي بليـاك
.. .. .. .. .. .. .. .. .. .. .. .. .. .. لا من غدينا كل واحـد.. بــ وادي

لو قلت اداوي جرحي اللي تباطـاك
.. .. .. .. .. .. .. .. .. .. .. .. .. .. ما كل جرح يفيـد فيه...الضمـادي

اعلنت حبك ليـن كـل ٍ .. تمنـاك
.. .. .. .. .. .. .. .. .. .. .. .. .. .. غلطه وغيري من خطاي استفادي

لو .. لي .. مثل قلبـك تمنيت..فرقـاك
.. .. .. .. .. .. .. .. .. .. .. .. .. .. واكيد قبلك بالجفا.. صـرت بـادي

حلـوه عذاريبـك وحلوه..مزايـاك
.. .. .. .. .. .. .. .. .. .. .. .. .. .. حتى بيوم فراقنـا.. كنـت هـادي

كن الليالي ودهـا تكسـب رضـاك
.. .. .. .. .. .. .. .. .. .. .. .. .. .. وآنا يطول مع الليالـي .. جهـادي

في ذمتي.. ما هي غريبة خطايـاك
.. .. .. .. .. .. .. .. .. .. .. .. .. .. مبطي وقلبك لو تنبهـت.. غـادي

سهله على من كان مثلك..وشرواك
.. .. .. .. .. .. .. .. .. .. .. .. .. .. مثل الثياب.. يغيرون .. المبـادي

علمنـي اكره..ذكرياتك..وطريـاك
.. .. .. .. .. .. .. .. .. .. .. .. .. .. وانسى من الليله صدوق الـودادي

ولاني بقايل عقبها ..وين ابالقـاك
.. .. .. .. .. .. .. .. .. .. .. .. .. .. راضي لو ان جروح قلبي .. جدادي

ولا القصايد.. جعلها مـن فدايـاك
.. .. .. .. .. .. .. .. .. .. .. .. .. .. لبستها..مبطي ثيـاب ..الحـدادي

باكر على المخطى يدورن الافـلاك
.. .. .. .. .. .. .. .. .. .. .. .. .. .. ونشوف.. من يصعب عليه البعادي

[ثابت الخطوه]

حسّـي بلوعـات الليالـي والاحـزان
.. .. .. .. .. .. .. .. .. .. .. .. .. .. بعديـن حسـي بالهـوى لا بغيـتـي

وش به يهمك لو يقولـون زعـلان !؟
.. .. .. .. .. .. .. .. .. .. .. .. .. .. لو فيـك ذرّه مـن غـلا .. ماجفيتـي

يا اللي تقوليـن الخطـأ زلـت لسـان
.. .. .. .. .. .. .. .. .. .. .. .. .. .. فـي زحمـة الايـام ليـه اختفيـتـي ؟

خطاي وان جا .. مدري الذنب وش كان
.. .. .. .. .. .. .. .. .. .. .. .. .. .. ليـه انتهـى ذاك الغـلا وانتهيـتـي ؟

وقفت في وجه الزمـن قـدر الامكـان
.. .. .. .. .. .. .. .. .. .. .. .. .. .. وانتي جنح فيـك الخيـال .. وغفيتـي

غلطان انا في كـل الاحـوال غلطـان
.. .. .. .. .. .. .. .. .. .. .. .. .. .. اسرجت لك خيـل القصيـد وسريتـي

جيتي وقلت الجرح يـوم اقبلـت هـان
.. .. .. .. .. .. .. .. .. .. .. .. .. .. واثرك على الجرح القديـم ارتكيتـي !!

قلتـي لـي ان الحـب لابـد ينصـان
.. .. .. .. .. .. .. .. .. .. .. .. .. .. واليـوم ماكنـك دقـايـق هويـتـي !

شافوك حساد الهوى شـوف الاعيـان
.. .. .. .. .. .. .. .. .. .. .. .. .. .. يومك علـى رجـم القصايـد رقيتـي

العام لك طـاري بقلبـي ولـك شـان
.. .. .. .. .. .. .. .. .. .. .. .. .. .. واليـوم احـس بغلطتـي لا طريـتـي

وان قدّر المولـى وعشتـي بحرمـان
.. .. .. .. .. .. .. .. .. .. .. .. .. .. ومـن حـرّ لوعـات التجافـي بكيتـي

تذكـري قلـبٍ لـه سنيـن شفـقـان
.. .. .. .. .. .. .. .. .. .. .. .. .. .. شوفي بحقـه يـا كثـر مـا خطيتـي

كل القصيد اللـي اقولـه علـى شـان
.. .. .. .. .. .. .. .. .. .. .. .. .. .. تهـزك الذكـرى عقـب مـا نسيتـي

[ثابت الخطوه]

لا يا علي الوضع هذا ما يناسبنـي
.. .. .. .. .. .. .. .. .. .. .. .. .. .. قل له يفارق ترى لي بـان تزييفـه

يروح يبعد..وثم يرجـع يقربنـي
.. .. .. .. .. .. .. .. .. .. .. .. .. .. يبيني اتبع هواه واخضـع لكيفـه

يخطي..ويزعل ويرجع لي يؤنبنـي
.. .. .. .. .. .. .. .. .. .. .. .. .. .. اسكت وانا اسمع تفاهاته وتخريفه

ماني بتمثال وقت الضيق ينصبنـي
.. .. .. .. .. .. .. .. .. .. .. .. .. .. عنه اتلقى خطا غيـره وتهديفـه

عذروبي اللي يعرفه مـا يعيبنـي
.. .. .. .. .. .. .. .. .. .. .. .. .. .. كتاب مكشوف واضح فيه تحريفـه

الموقف اللي حصل بالحيل متعبنـي
.. .. .. .. .. .. .. .. .. .. .. .. .. .. ولا يحاول بثوب الكـذب تلحيفـه

قله فراقه ترى ما عـاد يرعبنـي
.. .. .. .. .. .. .. .. .. .. .. .. .. .. ما عاد يسوى بعيني( ربع تعريفـه )

انغام عزفه ترى ما عاد تطربنـي
.. .. .. .. .. .. .. .. .. .. .. .. .. .. عندي تساوى برود شتاه مع صيفه

مانـي معاتـب وقلـه لا يعاتبنـي
.. .. .. .. .. .. .. .. .. .. .. .. .. .. جوي تعكر ولا اطلب منه تلطيفـه

نهر العطا جف قل له لا يحاسبنـي
.. .. .. .. .. .. .. .. .. .. .. .. .. .. القلب مما علق به صعب تنظيفـه

[ثابت الخطوه]

هب الهوى غرب وأجتاح الضلوع وشعرت
.. .. .. .. .. .. .. .. .. .. .. .. .. .. إن الليالـي الجميلـة هــب نسناسـهـا

مـدري كبـر حلمنـا ولا بعينـي كبـرت
.. .. .. .. .. .. .. .. .. .. .. .. .. .. وإلا هي أوهـام ودي يصـدق إحساسهـا

تنساني أيـام وتجينـي متـى مـا ذكـرت
.. .. .. .. .. .. .. .. .. .. .. .. .. .. إليا متى وأنت روحـي حابـس أنفاسهـا

كنت أجمل أحلام عمري بس ليه إنكسـرت
.. .. .. .. .. .. .. .. .. .. .. .. .. .. يا زين الأحـلام لـو مـا ينكسـر باسهـا

بيديك مديت لي كـاس المحبـه وصـرت
.. .. .. .. .. .. .. .. .. .. .. .. .. .. أنا أول اللـي يـذوق المـر مـن كاسهـا

من يومها وأنت قدام عيني ولو ما ظهـرت
.. .. .. .. .. .. .. .. .. .. .. .. .. .. دايـم وعينـي تشوفـك بيـن جلاسـهـا

قدرت ولا على نفسـي معـك مـا قـدرت
.. .. .. .. .. .. .. .. .. .. .. .. .. .. لازاد عنـهـا غيـابـك زاد وسواسـهـا

لو شفت حال الورق والشعر عقبك عـذرت
.. .. .. .. .. .. .. .. .. .. .. .. .. .. اللي حـرق صفحـة الماضـي وكراسهـا

ما كنت أصدق يجي يوم ابتسـم لانظـرت
.. .. .. .. .. .. .. .. .. .. .. .. .. .. أطلال ركـب الليالـي مـر ..مـا داسهـا

وإلا أنت لو قلت لي نادم وجيت اعتـذرت
.. .. .. .. .. .. .. .. .. .. .. .. .. .. كان اجمل ابيات شعـري ينحنـي راسهـا

ما فيه داعـي توصينـي تـراي اعتبـرت
.. .. .. .. .. .. .. .. .. .. .. .. .. .. فرقاك ذكـرى وشعـري علـق اجراسهـا

يكفيني البارح إني فـي عيونـك سهـرت
.. .. .. .. .. .. .. .. .. .. .. .. .. .. وقفـت بيـن العيـون السـود وانعاسهـا

إن رحت ما أنت اول اللي راح وان حضرت
.. .. .. .. .. .. .. .. .. .. .. .. .. .. قلـت الليـال الجميلـه هـب نسناسـهـا

[ثابت الخطوه]

هذى اللى غلاها ما يبى قـول قايـل
.. .. .. .. .. .. .. .. .. .. .. .. .. .. هذى اسباب غيضى والرضا والهيام

هذى رسومها بين الضلوع النحايـل
.. .. .. .. .. .. .. .. .. .. .. .. .. .. هذى اللى على صدر القصيده وسـام

الاصايل يجنّك مثل أهلهـن أصايـل
.. .. .. .. .. .. .. .. .. .. .. .. .. .. والوكـاد إنّهـا منهـن بليّـا كـلام

يوم فلّت على الخصر النحيل الجدايل
.. .. .. .. .. .. .. .. .. .. .. .. .. .. وإستدارت خجل مدرى تصنّع غـرام

عودها مال لو هى ما تبيـه يتمايـل
.. .. .. .. .. .. .. .. .. .. .. .. .. .. ما هو بكيفها من ليـن ذاك القـوام

واقف وكن رجلى فوق جرف متهايل
.. .. .. .. .. .. .. .. .. .. .. .. .. .. للجمال بعيـون العاشقيـن إحتـرام

قلت فى خاطرى مانى عليهـا بعايـل
.. .. .. .. .. .. .. .. .. .. .. .. .. .. لكن القلـب سابقنـى بـرد السـلام

مانى اللى حذف عند الزناد الفتايـل
.. .. .. .. .. .. .. .. .. .. .. .. .. .. يومها ولّعـت نـاره تغطّـى ونـام

واجد الزين عند الحاضره والقبايـل
.. .. .. .. .. .. .. .. .. .. .. .. .. .. شفت واجد ومرّنـى مـرور الكـرام

بس هذى وصايفها علـوم وهوايـل
.. .. .. .. .. .. .. .. .. .. .. .. .. .. كنّها قطعةٍ مـن نـور بـدر التمـام

يا كثر ملحها والا الحـلا لـه دلايـل
.. .. .. .. .. .. .. .. .. .. .. .. .. .. حورٍ عيونها والخشـم سلّـة حسـام

كن ذيك الخدود بروق مـا تنتخايـل
.. .. .. .. .. .. .. .. .. .. .. .. .. .. لا كساهن شعرها شفت برق وظـلام

تعسف الخيل ونفوس البشر تنتحايل
.. .. .. .. .. .. .. .. .. .. .. .. .. .. مير خيل القصايد ما يطيـق اللجـام

انتحيت ولقيت القلب مأمن صمايـل
.. .. .. .. .. .. .. .. .. .. .. .. .. .. كل ماذعذع الغربى من الشوق هـام

يا كثر ما نى من الشوق والحب شايل
.. .. .. .. .. .. .. .. .. .. .. .. .. .. من عشق مثلها وشلـون بالله يـلام

هذى اللى حلاها ما يبى قـول قايـل
.. .. .. .. .. .. .. .. .. .. .. .. .. .. ما هى أول غلا لاشك مسك الختـام

[ثابت الخطوه]

مدرى البارحه ويش إفتكرت وسرحت
.. .. .. .. .. .. .. .. .. .. .. .. .. .. هى طوارى والا ان هموم قلبى ثقـال

هى طرت لى قديم الذكريات ولمحـت
.. .. .. .. .. .. .. .. .. .. .. .. .. .. زول والا الحكايـه كلبوهـا خـيـال

هجّن ركاب فكرى بالمشاعر وصحـت
.. .. .. .. .. .. .. .. .. .. .. .. .. .. منهو اللـى تغافلنـى وفـك العقـال

ضقت والبال عمس ومنقلب فوق تحت
.. .. .. .. .. .. .. .. .. .. .. .. .. .. هى من شوى يوم تفوح صفر الـدلال

ودى افرح ومن مبطى انا ما فرحـت
.. .. .. .. .. .. .. .. .. .. .. .. .. .. ودي القا عن شموس الحبايب ظـلال

كم سنه عقب مركوز النهد ما فتحـت
.. .. .. .. .. .. .. .. .. .. .. .. .. .. قلبـى ولا عيونـى للغـلا والجمـال

لو بغيت انتهز فرصات واجد ربحـت
.. .. .. .. .. .. .. .. .. .. .. .. .. .. كانت اجمل فرص عمرى تنادى تعـال

ما هو بعيـب لا زلّيـت والا جنحـت
.. .. .. .. .. .. .. .. .. .. .. .. .. .. منهو اللى بلغ فينـا حـدود الكمـال

وانت يا اللى عن حدود المحبه نزحت
.. .. .. .. .. .. .. .. .. .. .. .. .. .. كل ما شد لك حيلـي تشـد الرحـال

ما شكيتك لو انى من جفاك انذبحـت
.. .. .. .. .. .. .. .. .. .. .. .. .. .. وانت شف حكمة الخالق ذبحك الدلال

لا تقول انك بذاك التصـرف مزحـت
.. .. .. .. .. .. .. .. .. .. .. .. .. .. يوم سويت فى هاك النهـار احتفـال

ما هجيتك ولا كنى ابـد مـا مدحـت
.. .. .. .. .. .. .. .. .. .. .. .. .. .. كلبوهن عقب هالعشره اكبـر محـال

صاحبى دام انا منك وعليك انجرحـت
.. .. .. .. .. .. .. .. .. .. .. .. .. .. لا تجينى على درب الخطـا والخمـال

تدرى انى تحمّلت الكثيـر وسمحـت
.. .. .. .. .. .. .. .. .. .. .. .. .. .. خابر ان التسامح من كريم الخصـال

ليه تفهم غلط وشفيك لبعيـد رحـت
.. .. .. .. .. .. .. .. .. .. .. .. .. .. ما طلبتك تشيل الهم يا بـن الحـلال

ما شغل بالى الا يـوم افكـر بنحـت
.. .. .. .. .. .. .. .. .. .. .. .. .. .. القصايـد واحفّظهـا قلـوب الرجـال

قالوا انى بترويض القوافـى نجحـت
.. .. .. .. .. .. .. .. .. .. .. .. .. .. قلت اجل كيف لو بزعل وامس الحبال

لو تخوّفت من درب الخطر ما فلحـت
.. .. .. .. .. .. .. .. .. .. .. .. .. .. ما يهـاب الصعـاب الا ردي العيـال

عكس تيارهم شفنى جزمت وسبحـت
.. .. .. .. .. .. .. .. .. .. .. .. .. .. ما حرصت انى اترك للتراجع مجـال

لو طموحى قريّب من زمااان استرحت
.. .. .. .. .. .. .. .. .. .. .. .. .. .. مير خابر محلي فـوق روس الجبـال

[ثابت الخطوه]

مرفوض يا اللى بعت غيره عشانه
.. .. .. .. .. .. .. .. .. .. .. .. .. .. أزريت عن رد الجزا أو تهاونـت

ما بي لك أكثر سدّ بـاب الميانـه
.. .. .. .. .. .. .. .. .. .. .. .. .. .. بانت مع الوقـت الخفايـا وبينـت

ما دام ما لى وسـط قلبـك مكانـه
.. .. .. .. .. .. .. .. .. .. .. .. .. .. أنا بعد مثلك عـن الحـب هونـت

أنـا مثـل خيـال خانـه حصانـه
.. .. .. .. .. .. .. .. .. .. .. .. .. .. عذره يقول من الرسن ما تمكنـت

غرّه مع المركاض وارخى عنانـه
.. .. .. .. .. .. .. .. .. .. .. .. .. .. مخطى وانا غلطان يوم انى امنـت

لو كنت وافى مـا تخـون الامانـه
.. .. .. .. .. .. .. .. .. .. .. .. .. .. ياللى تقول تشيب روحك ولا خنت

ذاك الهوى لو ما شعـرت بحنانـه
.. .. .. .. .. .. .. .. .. .. .. .. .. .. ما كنت فى حلو القصايـد تفنّنـت

شاعر تزلزل مـن فراقـك كيانـه
.. .. .. .. .. .. .. .. .. .. .. .. .. .. لك يعترف ما يسكن القلب غير انت

لو كان قلبك صافـى الـود خانـه
.. .. .. .. .. .. .. .. .. .. .. .. .. .. فى ذمّتى ما هان حبّـك ولا هنـت

أحدٍ يخون وواحد ٍ الوقـت خانـه
.. .. .. .. .. .. .. .. .. .. .. .. .. .. أنا ترى الثانى وألاوّل تراه أنـت ؟

[ثابت الخطوه]

رغم التعب والتناقض منزلك عالي
.. .. .. .. .. .. .. .. .. .. .. .. .. .. لو كنت في خطوتك تكثر تعاريجـك

عنيد لكن عنادك حيـل .. يحلالـي
.. .. .. .. .. .. .. .. .. .. .. .. .. .. ولو كان للعند تاج اعلنت تتويجـك

لكن ترفق وشوف وجيه..عذااالـي
.. .. .. .. .. .. .. .. .. .. .. .. .. .. تفرح..تأيد صدودك لي وتحجيجـك

يكفي تشوف بعيونك ثوبي البالـي
.. .. .. .. .. .. .. .. .. .. .. .. .. .. اللي تمزق تحت قسـوة كرابيجـك

حزيـن رددت للاحـزان مـوالـي
.. .. .. .. .. .. .. .. .. .. .. .. .. .. وانت إتغنى فرح واسمع اهازيجـك

لا زلت احبك..ولكن وعد..يالغالـي
.. .. .. .. .. .. .. .. .. .. .. .. .. .. لابد..اوقف دعاباتـك وتهريجـك

وإن كنت مهر ..ولا روضك خيالي
.. .. .. .. .. .. .. .. .. .. .. .. .. .. جيت وعلى جثتي عسفك وتسريجك

[ثابت الخطوه]

لا تنشغل فيني أنـا بحالـي ادرى
.. .. .. .. .. .. .. .. .. .. .. .. .. .. قلب ٍ تعلّق فيك ينسى مـع الوقـت

اكثر من اللي صار لي ويش يجرى
.. .. .. .. .. .. .. .. .. .. .. .. .. .. بين الرجا والياس فكـري تعلّقـت

مثلي ولو شفته عن همومه ازرى
.. .. .. .. .. .. .. .. .. .. .. .. .. .. ما قال ليتك في جروحـه ترافقـت

هاك القصايد لا تضايقـت واقـرى
.. .. .. .. .. .. .. .. .. .. .. .. .. .. شف وش كثر فيها لبسماتك اشتقت

أثر الوفا ينبـاع عنـدك ويشـرى
.. .. .. .. .. .. .. .. .. .. .. .. .. .. ما كنت اصدق فيك واليوم صدّقـت

يا مشتهي فرقا المواليـف حـذرى
.. .. .. .. .. .. .. .. .. .. .. .. .. .. تبعد وأنا من سكرة الحب ما فقـت

لا طافت الفرصة تحريـت الأخـرى
.. .. .. .. .. .. .. .. .. .. .. .. .. .. وتروح ما كنـي عليهـا تشوقـت

ساري لو إن الليل ما فيـه قمـرا
.. .. .. .. .. .. .. .. .. .. .. .. .. .. أشيل من حمل الهوى فوق ما طقت

لاصار حظ أقشر والايـام قشـرى
.. .. .. .. .. .. .. .. .. .. .. .. .. .. ما فيه احد عاقل يلومك إليا ضقـت

صحيح بعض الناس فرقاه بشـرى
.. .. .. .. .. .. .. .. .. .. .. .. .. .. وبعض البشر لا غاب ليله تضايقت

ليتك خذيت بليل الاحباب مسـرى
.. .. .. .. .. .. .. .. .. .. .. .. .. .. غربت من كثر الطواري وشرّقـت

السيل يبقى له على القاع مجـرى
.. .. .. .. .. .. .. .. .. .. .. .. .. .. ويبقى لك التذكار لو كنت فارقـت

اشوف لك من وين مارحت ذكـرى
.. .. .. .. .. .. .. .. .. .. .. .. .. .. ولا شفتها صديت عنهـا ودنقـت

ما كل جـرحٍ لاخـذا أيـام يبـرى
.. .. .. .. .. .. .. .. .. .. .. .. .. .. بعض الجروح يزيد شره مع الوقت

[ثابت الخطوه]

ما قلت لي شي وش خليـت مـا قلتـه
.. .. .. .. .. .. .. .. .. .. .. .. .. .. اسكت وخـل الكـلام لجرحـي الدامـي

لو غيرك اللـي يسولـف مـا تحمّلتـه
.. .. .. .. .. .. .. .. .. .. .. .. .. .. لكن على شـان عينـك هانـت ألامـي

للحـب مفهـوم عمـرك مـا تخيلـتـه
.. .. .. .. .. .. .. .. .. .. .. .. .. .. ما أظـن يستوعبـه تفكيـرك السامـي

هذا الفـراق الطويـل وهـذي أسئلتـه
.. .. .. .. .. .. .. .. .. .. .. .. .. .. هـذا حصـاد السنيـن وهـذي أيامـي

يا ما ويـا مـا عليـك البـال طولتـه
.. .. .. .. .. .. .. .. .. .. .. .. .. .. والعمر عدى وأنا عايش على أوهامـي

حتى طريـق الفـراق اللـي تساهلتـه
.. .. .. .. .. .. .. .. .. .. .. .. .. .. لقيته أصعب على نفسـي مـن أقدامـي

اصبر لـي شـوي لـو دمـي تثاقلتـه
.. .. .. .. .. .. .. .. .. .. .. .. .. .. بحاول أستوعـب اللـي صـار قدامـي

الحب ضحكة بعينـك بـس مـا طلتـه
.. .. .. .. .. .. .. .. .. .. .. .. .. .. عمرك بـهالكون شفت أبسط من احلامي

القلب لو ما خفق لك كـان مـا شلتـه
.. .. .. .. .. .. .. .. .. .. .. .. .. .. ولو ما أنت ملهم قصيدي جفت أقلامـي

هـذا قصيـدي بعينـك لـو تجاهلـتـه
.. .. .. .. .. .. .. .. .. .. .. .. .. .. ينزف على شأن يروي قلبـك الضامـي

العـام طـاري غيابـك مــا تقبلـتـه
.. .. .. .. .. .. .. .. .. .. .. .. .. .. واليوم حرماني أصبح مصـدر إلهامـي

لا تعتذر لـي وابنسـى كـل مـا قلتـه
.. .. .. .. .. .. .. .. .. .. .. .. .. .. وش ينفع العذر لامن ضاعـت أيامـي ؟

[ثابت الخطوه]

دليل المحبه شوف عيني عليك تغـار
.. .. .. .. .. .. .. .. .. .. .. .. .. .. ولا ودي الحاسـد عيونـك يطالعهـا

مع إنك رحلت بعيد لكن بقى التذكـار
.. .. .. .. .. .. .. .. .. .. .. .. .. .. إليا شافتـه عينـي تسابـق مدامعهـا

دفنت الغرام بخافقي والقلوب أسـرار
.. .. .. .. .. .. .. .. .. .. .. .. .. .. مشاعر هقيـت إن الليالـي تضيعهـا

فرحت برجوعك ما طلبت لخطاك اعذار
.. .. .. .. .. .. .. .. .. .. .. .. .. .. ونفسي نست ما جرى من تواضعهـا

تهادت مشاعر خاطري لك بلا معيـار
.. .. .. .. .. .. .. .. .. .. .. .. .. .. تجاهلتها لـو كنـت خابـر دوافعهـا

يقولون جنّب درب مالك معـه معبـار
.. .. .. .. .. .. .. .. .. .. .. .. .. .. يلومون نفسٍ بعد الاحبـاب موجعهـا

يقولونها قبلي يخـون البحـر بحّـار
.. .. .. .. .. .. .. .. .. .. .. .. .. .. والأمواج لا هاجت خذت ما تبي معهـا

تكاثرت منك الصد وأثر العلـوم كبـار
.. .. .. .. .. .. .. .. .. .. .. .. .. .. لقيتك على نفسـي تقلّـب مواجعهـا

أقوله وأنا اللي شفت ذاك الغلا ينهـار
.. .. .. .. .. .. .. .. .. .. .. .. .. .. يشوف الندم رجّال نفسـه يطاوعهـا

مثل ما ضرب جّوٍ خلا غـادي محتـار
.. .. .. .. .. .. .. .. .. .. .. .. .. .. يدّوج ورجله ما درى ويـن موقعهـا

تعرض سموم القيض والدار ما من دار
.. .. .. .. .. .. .. .. .. .. .. .. .. .. هليك وشعر بالموت روحـه ينازعهـا

جحدت الغلا لين امتلا بالخفوق وثـار
.. .. .. .. .. .. .. .. .. .. .. .. .. .. قصايد عساها اليوم تطـرق مسامعهـا

غرامك مثل نارٍ حطبهـا الغـلا النـار
.. .. .. .. .. .. .. .. .. .. .. .. .. .. تموت وغلاك اللـي بقلبـي يولعهـا

غلاك بضميري واضحٍ ما عليه غبـار
.. .. .. .. .. .. .. .. .. .. .. .. .. .. تشيل الغلا نفسي وأنا عاجـز امنعهـا

يقولون ما ودعّك : قلت الفراق وصار
.. .. .. .. .. .. .. .. .. .. .. .. .. .. والإنسان روحه تنسلب ما يودعهـا !

هذيك الليالي وين أثـر الزمـن دوار
.. .. .. .. .. .. .. .. .. .. .. .. .. .. خذاهـا ولا ظنـي زمانـي يرجّعهـا

طوتها السنين ولا بقالي سوى التذكار
.. .. .. .. .. .. .. .. .. .. .. .. .. .. إليا شافتـه عينـي تسابـق مدامعهـا

[ثابت الخطوه]

هذا الخبر صدمه وحزن وعلامـه
.. .. .. .. .. .. .. .. .. .. .. .. .. .. على محبّـة كـل الامـه لخطـاب

هذا الخبر والهـم هـذى خيامـه
.. .. .. .. .. .. .. .. .. .. .. .. .. .. شرّع للأحزان النوافـذ والابـواب

ألحقت من جاب الخبر لى ملامـه
.. .. .. .. .. .. .. .. .. .. .. .. .. .. صعبه على الانسان توديع الاحباب

البارحه غابت عن العيـن قامـه
.. .. .. .. .. .. .. .. .. .. .. .. .. .. قامة رجل زلزل قناعات واحـزاب

ترجّـل الفـارس وذب العمـامـه
.. .. .. .. .. .. .. .. .. .. .. .. .. .. واستقبل الموت بحفاوه وترحـاب

ترجّل بصمـت ووقـار وصرامـه
.. .. .. .. .. .. .. .. .. .. .. .. .. .. حتى وفاته شى يدعـو للأعجـاب

من يعتبر فقـدان كفـه وسامـه
.. .. .. .. .. .. .. .. .. .. .. .. .. .. أكيد ما هو لحظة المـوت مرتـاب

وجه ٍ واهو مسجّى بدر فى تمامـه
.. .. .. .. .. .. .. .. .. .. .. .. .. .. ميت ولكنه و هـو ميّـت مهـاب

أومت له كفـوفٍ تمنّـت سلامـه
.. .. .. .. .. .. .. .. .. .. .. .. .. .. بكته الامه قبـل تبكيـه الاقـراب

خطاب ما هو بس رمز الشهامـه
.. .. .. .. .. .. .. .. .. .. .. .. .. .. خطاب نجمٍ فى سما الامه وغـاب

حر شهـر والطلـع دار الكرامـه
.. .. .. .. .. .. .. .. .. .. .. .. .. .. والحر ما يعنيه تحليـق الاسـراب

فعله فرض على الجميع إحترامـه
.. .. .. .. .. .. .. .. .. .. .. .. .. .. واسمه ملا الدنيا بطوله وهو شاب

ما كانـت الدنيـا مثـار اهتمامـه
.. .. .. .. .. .. .. .. .. .. .. .. .. .. بالعكس كان لنصرة الدين وثـاب

لو كان يبحث عن نفوذ وزعامـه
.. .. .. .. .. .. .. .. .. .. .. .. .. .. كان امتلا صدره نياشين والقـاب

الاخره كانت علـى طـول امامـه
.. .. .. .. .. .. .. .. .. .. .. .. .. .. فى هالزمن خطاب واشباهه اغراب

اختـار بديـار الجهـاد الاقامـه
.. .. .. .. .. .. .. .. .. .. .. .. .. .. ومن كان هذى رغبته لازم يثـاب

واختـار بالاسـلام ذروة سنامـه
.. .. .. .. .. .. .. .. .. .. .. .. .. .. الصبح ساحة حرب والليل محراب

يكفيه فخـر ان الشهـاده ختامـه
.. .. .. .. .. .. .. .. .. .. .. .. .. .. ما حسّب لدنياه ولعمـره احسـاب

يا رب تغفر لـه وترفـع مقامـه
.. .. .. .. .. .. .. .. .. .. .. .. .. .. وتعظّم أجر إمـة محمـد بخطـاب

[ثابت الخطوه]

ماني اعمى بصيره بس وش عاد اسوي
.. .. .. .. .. .. .. .. .. .. .. .. .. .. ما يطيب الجريح ان كان مـا ينتـداوى

كن حبه على حدب الضلـوع امتطـوي
.. .. .. .. .. .. .. .. .. .. .. .. .. .. كيف ابقوى وانا بيبان قلبـي تهـاوى

شوف قلبي من جروح البعـاد متكـوي
.. .. .. .. .. .. .. .. .. .. .. .. .. .. عقب ما قلت جرح العام طاب وتشـاوى

يوم ساقوا ركايبهـم وشبيـت ضـوي
.. .. .. .. .. .. .. .. .. .. .. .. .. .. ما تخوفت وسباع الخلا .. لي تعـاوى

اشهد انه تعكر عقـب مـا راح جـوي
.. .. .. .. .. .. .. .. .. .. .. .. .. .. ما نسيتـه وزولـه للعيـون يتـراوى

زل وقت الوعد ما عـاد فيهـا تـروى
.. .. .. .. .. .. .. .. .. .. .. .. .. .. بس انا وانت يا حرف القصيد انتخاوى

قلهم يـا قصيـدي لا يروحـون تـوي
.. .. .. .. .. .. .. .. .. .. .. .. .. .. ماني اللي حضوره مع غيابـه تسـاوى

رد عني علـوم ٍ مـا تفـرّح عـدوي
.. .. .. .. .. .. .. .. .. .. .. .. .. .. قلهم ( متعب التركي ) عليـل وتـداوى

[ثابت الخطوه]

ليل هاك الجدايل طـال مسـراه
.. .. .. .. .. .. .. .. .. .. .. .. .. .. بين تفسير حلـم وبيـن امانـي

يوم حد الغلا قلبي علـى أقصـاه
.. .. .. .. .. .. .. .. .. .. .. .. .. .. شرّع القلـب بيبـان المحانـي

ما رمانـي ولكـن قلبـي أدمـاه
.. .. .. .. .. .. .. .. .. .. .. .. .. .. عـاد وشلـون لا منـه رمانـي

لا نقض ليـل مجدولـه وخـلاه
.. .. .. .. .. .. .. .. .. .. .. .. .. .. قلت وش هالظلام اللي غشانـي

لو يمر البحـر شاطـي شفايـاه
.. .. .. .. .. .. .. .. .. .. .. .. .. .. صار بحر الخليج فـرات ثانـي

وين ابلقاه مدري ويـن ابلقـاه
.. .. .. .. .. .. .. .. .. .. .. .. .. .. دامـه بكـل ذره فـي كيـانـي

ادري انه نسى الموعد ولا جـاه
.. .. .. .. .. .. .. .. .. .. .. .. .. .. بـس ليتـه نسـاه ولانسانـي

لو عيونه بحرهن ما ركـد مـاه
.. .. .. .. .. .. .. .. .. .. .. .. .. .. شط الاهداب صار اجمل موانـي

يكفي انه حفظ شعـري وغنـاه
.. .. .. .. .. .. .. .. .. .. .. .. .. .. وابتسم لي وقال ادري عشانـي

كل ما ترتسم بسمه على شفـاه
.. .. .. .. .. .. .. .. .. .. .. .. .. .. اشعـر انـه يجاملنـي زمانـي

ليه احبه واحب اسمـه وطريـاه
.. .. .. .. .. .. .. .. .. .. .. .. .. .. يوم اخذ دم قلبـي وش عطانـي

غاب وان شفت نفسي قادر انساه
.. .. .. .. .. .. .. .. .. .. .. .. .. .. قلت ربي كتب لي عمـر ثانـي

[ثابت الخطوه]

هاك ذكراك من ذكراك ويـش أستفيـد
.. .. .. .. .. .. .. .. .. .. .. .. .. .. كافـي أن المشاعـر هايمـه كلـهـا

ودي انساك والنسيان مـا هـو اكيـد
.. .. .. .. .. .. .. .. .. .. .. .. .. .. كيف ابنسى عيـون ٍ رمشهـا ظلهـا

من هك اليوم وانت اللي بعيني وحيـد
.. .. .. .. .. .. .. .. .. .. .. .. .. .. ما خبرت العيـون تمـل مـن خلهـا

مير نفسي عزيزه وانت رايـك عنيـد
.. .. .. .. .. .. .. .. .. .. .. .. .. .. والنفـوس العزيـزه مـا تبـي ذلهـا

ليه تعطيني الدافـع واقـول القصيـد
.. .. .. .. .. .. .. .. .. .. .. .. .. .. ليه صفحـه غرامـي ترجـع تفلهـا

ليه ترجع على الماضي تزيـد وتعيـد
.. .. .. .. .. .. .. .. .. .. .. .. .. .. وانت من عـام الاول عاجـز تحلهـا

ما برى الجرح الاول كيف يبرى الجديد
.. .. .. .. .. .. .. .. .. .. .. .. .. .. شوف حالي نزيـف جروحهـا سلهـا

كل ما شفت لك ذكرى وربـي شهيـد
.. .. .. .. .. .. .. .. .. .. .. .. .. .. كـن نـزاع روحـي بالحفـا تلـهـا

اندفعـت لغرامـك يالغـزال الفـريـد
.. .. .. .. .. .. .. .. .. .. .. .. .. .. والغـلا لـه دروب خاطـري دلـهـا

فرحتي باللقا رغـم انهـا مـا تفيـد
.. .. .. .. .. .. .. .. .. .. .. .. .. .. فرحـه القـاع لا مـن المطـر بلهـا

وش بقى يالسراب اللي قريـب ٍ بعيـد
.. .. .. .. .. .. .. .. .. .. .. .. .. .. المحبـه وراحـت وانتهـى حلـهـا

لو كـل ٍ بكيفـه يأخـذ اللـي يريـد
.. .. .. .. .. .. .. .. .. .. .. .. .. .. كان ما شفت ناس تموت فـي غلهـا

هاك فرقاك خذهـا خـل قلبـك شديـد
.. .. .. .. .. .. .. .. .. .. .. .. .. .. خلهـا مـا شيـه بحمولهـا خلـهـا

كـل مـا زاد تعذيبـك ذنوبـك تزيـد
.. .. .. .. .. .. .. .. .. .. .. .. .. .. الله اعلـم صلاتـك باطـلـه كلـهـا

[ثابت الخطوه]

اخر اللي سمعته فـي نهـار الـوداع
.. .. .. .. .. .. .. .. .. .. .. .. .. .. دقت القلب مدري صوت عجل الخطاوي

نايف الطول وش سوّا بـي الانقطـاع
.. .. .. .. .. .. .. .. .. .. .. .. .. .. صار بين الضلوع القلب كنـه فـداوي

بيني وبين ضحكـات السعـاده نـزاع
.. .. .. .. .. .. .. .. .. .. .. .. .. .. كني اللي قضى عمره طريد ٍ جـلاوي

لا تلوم الذي سـوى لـك المستطـاع
.. .. .. .. .. .. .. .. .. .. .. .. .. .. خف من الله وخل جروحنا بالتسـاوي

عن هذيك النواعس ليه شلت القنـاع
.. .. .. .. .. .. .. .. .. .. .. .. .. .. الحيا وين ياللي طول عمـرك حيـاوي

كن خـدك الطاهـر بـروق وشعـاع
.. .. .. .. .. .. .. .. .. .. .. .. .. .. اثرها رحمة ٍ للناس بعـض الغشـاوي

وش يفيدك عذابي يا غريـب الطبـاع
.. .. .. .. .. .. .. .. .. .. .. .. .. .. ليه دايم على الملتاع سيلـك نحـاوي

امتلي غيض وازعل يوم وارجع بساع
.. .. .. .. .. .. .. .. .. .. .. .. .. .. راعي الجرح يستحمل عذاب المـداوي

غالطونـي وقالـوا ليـش هالاندفـاع
.. .. .. .. .. .. .. .. .. .. .. .. .. .. ادوخوني عليـك مكثريـن الحكـاوي

عذربوك بوجـودي بالجفـا والخـداع
.. .. .. .. .. .. .. .. .. .. .. .. .. .. فيك حلو الوصايف صوروها مسـاوي

التزمت السكوت ورأيهم فـي ضيـاع
.. .. .. .. .. .. .. .. .. .. .. .. .. .. لين قالوا ( متعب ) على البعد نـاوي

ميّت القلب عرضـت الغـلا للضيـاع
.. .. .. .. .. .. .. .. .. .. .. .. .. .. والله اني على قطع الرجا بك مـراوي

ما تغيرت ليـن انـك لويـت الـذراع
.. .. .. .. .. .. .. .. .. .. .. .. .. .. تحسب اني على الهجران ما ني بقاوي

لو تقول انت ما عقب الفراق اجتمـاع
.. .. .. .. .. .. .. .. .. .. .. .. .. .. عندي اليوم كل اللي تقـول متسـاوي

او يقولون صار يخاف قلـب الشجـاع
.. .. .. .. .. .. .. .. .. .. .. .. .. .. من هك الليله وبيت القصيد امتهـاوي

بين شقر الجدايل والعيـون الوسـاع
.. .. .. .. .. .. .. .. .. .. .. .. .. .. اذكر اني فقدت القلب فـي هالحـراوي

[ثابت الخطوه]

جابتني الذكرى على الماضي أكتـاف
.. .. .. .. .. .. .. .. .. .. .. .. .. .. سجيـت كنـي تونـي مكتشفـهـا

سرى بي الهاجس ومريت الاطراف
.. .. .. .. .. .. .. .. .. .. .. .. .. .. دوجت حـول الساعتيـن بطرفهـا

نعم تذكـرت الزمـان الـذي طـاف
.. .. .. .. .. .. .. .. .. .. .. .. .. .. غديت مثـل اللـي عيونـه طرفهـا

لي في غرام ٍ فات كلمـه وميقـاف
.. .. .. .. .. .. .. .. .. .. .. .. .. .. لولا خفوقي هـام بـك مـا وقفهـا

اول غيابـك قلـت مابـي خـلاف
.. .. .. .. .. .. .. .. .. .. .. .. .. .. واليوم شف حالـي غيابـك تلفهـا

تجهل جروحي يا اللي جروحك خفاف
.. .. .. .. .. .. .. .. .. .. .. .. .. .. معذور لو قلبك جهـل مـا عرفهـا

يا ليت مجروح الهوى جرحه يشاف
.. .. .. .. .. .. .. .. .. .. .. .. .. .. لـ قول قرب مـن جروحـك وشفهـا

شفها بعينك كانك مـن الله تخـاف
.. .. .. .. .. .. .. .. .. .. .. .. .. .. حـاول تصلـح غلطـة ٍ مقترفهـا

العمر لا منـه خـلا منـك ينعـاف
.. .. .. .. .. .. .. .. .. .. .. .. .. .. في حـال والا حـال غيـر تعرفهـا

قدام عينـك لـو تطلعـت وخـلاف
.. .. .. .. .. .. .. .. .. .. .. .. .. .. تلقى الخفايا خاطـري لـك كشفهـا

خايف ومن مثلي معه حق لو خـاف
.. .. .. .. .. .. .. .. .. .. .. .. .. .. تبعد ونفسـي مـا تحقـق هدفهـا

ما للهوى عندك مواثيق وانصـاف
.. .. .. .. .. .. .. .. .. .. .. .. .. .. مـا كنـه الا لعـبـة ٍ محترفـهـا

اليوم لو ذكراك ترجع بـي خـلاف
.. .. .. .. .. .. .. .. .. .. .. .. .. .. محبتـك سيـل التهايـم جرفـهـا

[ثابت الخطوه]

لو قلت مرتاح ما نفسـي بمرتاحـه
.. .. .. .. .. .. .. .. .. .. .. .. .. .. غير التعب في غيابه مانـي بلاقـي

من عام الاول وقلبي تنزف اجراحـه
.. .. .. .. .. .. .. .. .. .. .. .. .. .. ضاقت على الوسيعه والفضا ضاقـي

لا بال مرتـاح لا فرحـه ولا راحـه
.. .. .. .. .. .. .. .. .. .. .. .. .. .. كم لي سنه وانتظر غيبـات سراقـي

ارجيه عقب البطا لو طـال مرواحـه
.. .. .. .. .. .. .. .. .. .. .. .. .. .. كانه على هقوتـي ماخـان ميثاقـي

قلب ٍ يذوق الهوى من يكبح اجماحـه
.. .. .. .. .. .. .. .. .. .. .. .. .. .. خلوه يرتاح دامـه بالهـوى شاقـي

اضحك وقلبي مع اللي عجة ارياحـه
.. .. .. .. .. .. .. .. .. .. .. .. .. .. لا قلت يا قلب طالت قال وش باقـي

اللي عيونـه وسـاع سـود ذباحـه
.. .. .. .. .. .. .. .. .. .. .. .. .. .. ازريت اداري غلاه بخافـي اوراقـي

ساكت وعيني ولو ما قلـت فضاحـه
.. .. .. .. .. .. .. .. .. .. .. .. .. .. حتى القصايد تخون وتفضح اشواقي

لو ما بغيت الهوى صابتني ارماحـه
.. .. .. .. .. .. .. .. .. .. .. .. .. .. ما جاه دون اللحم ساتـر ولا واقـي

مثل البحر كم غرق به ناس سباحـه
.. .. .. .. .. .. .. .. .. .. .. .. .. .. تضيع مع قوَ موجـه هقـوة الهاقـي

خبري بقلبه صدوق الشوق يجتاحـه
.. .. .. .. .. .. .. .. .. .. .. .. .. .. عندي خبر فيه ما يقوى على فراقـي

اتعب وغيري يجي ويأخذ على الراحه
.. .. .. .. .. .. .. .. .. .. .. .. .. .. من حظ غيري وانا اللي زارع وساقي

[ثابت الخطوه]

مشكور يا بايع مشاعـرك مشكـور
.. .. .. .. .. .. .. .. .. .. .. .. .. .. العام ذنب وهالسنـه ذنـب ثانـي

وش عاد اقول ولا بقى شي مستور
.. .. .. .. .. .. .. .. .. .. .. .. .. .. ما طعتني يوم ابتسـم لـي زمانـي

لا تعتذر لو خاطري منـك مكسـور
.. .. .. .. .. .. .. .. .. .. .. .. .. .. لا تفتكرنـي دام قلبـك نسـانـي

لا لا تقـول ان الليالـي لهـا دور
.. .. .. .. .. .. .. .. .. .. .. .. .. .. شف من هو اللي كان فينـا أنانـي

مدري تصنعت الغلا زور فـي زور
.. .. .. .. .. .. .. .. .. .. .. .. .. .. مدري انا اللي حيل كنـت متفانـي

مثل العما ما تنفعـه طلعـة النـور
.. .. .. .. .. .. .. .. .. .. .. .. .. .. النـور بعيـون العمـى مـا يبانـي

عندي خبر لو جاك من يمي قصور
.. .. .. .. .. .. .. .. .. .. .. .. .. .. لأقول انا مخطـي وربـي جزانـي

لو شفتني قاسي عليك انت معـذور
.. .. .. .. .. .. .. .. .. .. .. .. .. .. شفني من أول جرح لا زلت أعاني

انا بشر مثلك لي احساس وشعـور
.. .. .. .. .. .. .. .. .. .. .. .. .. .. واغتـاظ لا .. مـسّ الكـلام بكيانـي

حتى وانا في قمـة الغيـظ مقهـور
.. .. .. .. .. .. .. .. .. .. .. .. .. .. بعض الحكي عيـا يقولـه لسانـي

ابقولها لو قلت لي صابـك غـرور
.. .. .. .. .. .. .. .. .. .. .. .. .. .. ما فيه احـد يأخـذ بقلبـك مكانـي

العام قلبـي فيـك هايـم ومجبـور
.. .. .. .. .. .. .. .. .. .. .. .. .. .. العـام لا منـي جفيتـك عصانـي

واليوم حبك فـي حنايـاه مقبـور
.. .. .. .. .. .. .. .. .. .. .. .. .. .. لو مـا دعيتـه للمفـارق دعانـي

ذاك الهوى ما عاد لك فيه مقـدور
.. .. .. .. .. .. .. .. .. .. .. .. .. .. ابعد من ايـام الرشـى والسوانـي

ما دمت راضي عن عذابي ومسرور
.. .. .. .. .. .. .. .. .. .. .. .. .. .. ملعون ابو قلـب ٍ عليـك يحدانـي

[ثابت الخطوه]

ضحيت بالواقع على شان الاحلام
.. .. .. .. .. .. .. .. .. .. .. .. .. .. وضحيت بالغالي على شان غالي

حتى الغرام اللي كسر قلبي العام
.. .. .. .. .. .. .. .. .. .. .. .. .. .. ماني بحاله كان ما هـو بحالـي

ما ينحسب عمر البنادم بالاعوام
.. .. .. .. .. .. .. .. .. .. .. .. .. .. بعض السنين نعيش فيها ليالـي

[ثابت الخطوه]

متى ذكرتيني على شان تنسيـن
.. .. .. .. .. .. .. .. .. .. .. .. .. .. خليك مـره صادقـه وانصفينـي

في وقت واحد تكرهين وتحبيـن
.. .. .. .. .. .. .. .. .. .. .. .. .. .. انا تعبت استحملـك واعذرينـي

حبٍ سرق من عمري ايام وسنين
.. .. .. .. .. .. .. .. .. .. .. .. .. .. مثل الهوى مـا يمسكنـه يدينـي

[ثابت الخطوه]

احلى سنين العمر راحـت هدايـا
.. .. .. .. .. .. .. .. .. .. .. .. .. .. لك يا مجازي بالردى راعي الطيب

لي في حياتـك ذكريـات وخفايـا
.. .. .. .. .. .. .. .. .. .. .. .. .. .. تبقى ولو باكر غزا راسك الشيب

وإلا الوفا مـاله بقلبـك بقايـا
.. .. .. .. .. .. .. .. .. .. .. .. .. .. عند الذي مثلك اظن الوفا عيـب

[ثابت الخطوه]

ألبسي لك ثوب غير اللي عليك
.. .. .. .. .. .. .. .. .. .. .. .. .. .. من لبس ثوب الغرور اكبر غبي

تحسبين الناس خاتم في يديـك
.. .. .. .. .. .. .. .. .. .. .. .. .. .. من متى والعاطفه توخذ سبـي

فز لك قلبي وانا قمت احتريـك
.. .. .. .. .. .. .. .. .. .. .. .. .. .. والكريم يصير لضيوفه صبـي

[ثابت الخطوه]

مرت سنه وشهور وشوية ايـام
.. .. .. .. .. .. .. .. .. .. .. .. .. .. على غياب اللي حلاهـا شمالـي

كم قلت في نفسي قبل عيني تنام
.. .. .. .. .. .. .. .. .. .. .. .. .. .. يا رب جبها عند ما أصحى قبالي

تعبت ادور بيـن حزنـي والالام
.. .. .. .. .. .. .. .. .. .. .. .. .. .. عن صبري اللي ما بقى منه تالي

يا بنت خليت السوالـف للاقـلام
.. .. .. .. .. .. .. .. .. .. .. .. .. .. يكفيك لا عـز الكـلام انفعالـي

من صارت الدنيا حسابات وارقام
.. .. .. .. .. .. .. .. .. .. .. .. .. .. وانا عجزت استوعب اللي جرالي

ضحيت بالواقع على شان الاحلام
.. .. .. .. .. .. .. .. .. .. .. .. .. .. وضحيت بالغالي على شان غالي

حتى الغرام اللى كسر قلبي العام
.. .. .. .. .. .. .. .. .. .. .. .. .. .. ماني بحاله كـان ماهـو بحالـي

ما بنحسب عمر البنادم بالاعوام
.. .. .. .. .. .. .. .. .. .. .. .. .. .. بعض السنين نعيش فيها ليالـي

وجه التشابه بين قلبـك والايـام
.. .. .. .. .. .. .. .. .. .. .. .. .. .. القلب خالـي والليالـي خوالـي

[ثابت الخطوه]

يطول الجفا وتشاغل الخاطر المكسـور
.. .. .. .. .. .. .. .. .. .. .. .. .. .. ويبقى مـع الايـام طاريـك بلسانـي

اشوفك بعيني مع غياب وطلوع النـور
.. .. .. .. .. .. .. .. .. .. .. .. .. .. ذكرني خيالـك يـوم قلبـك تناسانـي

تذكرت يوم اني معك راضي ٍ مسـرور
.. .. .. .. .. .. .. .. .. .. .. .. .. .. وسجيت مدري هاجسي ويـن ودانـي

تخيلتك وفزيت طولـي بـدون شعـور
.. .. .. .. .. .. .. .. .. .. .. .. .. .. اثاريه طيفك صار له وقت مـا جانـي

طرتلي ليالـي لـو تذكرتهـا معـذور
.. .. .. .. .. .. .. .. .. .. .. .. .. .. لو الوقت يرجع كان انا جيتها عانـي

يداعب نسيم الليل مجدولـك المنثـور
.. .. .. .. .. .. .. .. .. .. .. .. .. .. تغطيه عني والهـوى يكشفـه ثانـي

تفوح الجدايل مسك مدري عطر وزهور
.. .. .. .. .. .. .. .. .. .. .. .. .. .. تعنيك في طولهـا والشـوق عنانـي

اثر من تولع لو سمع ما يطيع الشور
.. .. .. .. .. .. .. .. .. .. .. .. .. .. هو اللي يشوف وباقي الناس عميانـي

نسيت الليالي ذيك وشلون يا مغـرور
.. .. .. .. .. .. .. .. .. .. .. .. .. .. انا كنت اغالط من يقولـون تنسانـي

هذيك الليالي وين..؟ اثر الزمان يدور
.. .. .. .. .. .. .. .. .. .. .. .. .. .. رجح في عيونك ذيك الايـام ميزانـي

انا كيف ابنسى خابر ٍ قلبـي المجبـور
.. .. .. .. .. .. .. .. .. .. .. .. .. .. لو اني نسيتك ماني بناسـي احزانـي

زمانٍ مضى له دور واليوم غيره دور
.. .. .. .. .. .. .. .. .. .. .. .. .. .. انا اليوم ما لـد النظـر لـو تعدانـي

كفى ماجرى ما فيه داعي تجي مشكور
.. .. .. .. .. .. .. .. .. .. .. .. .. .. غرام الليالي ذيك خلـه علـى شانـي

[ثابت الخطوه]

يانفس هيـدي لا تزيديـن الأوجـاع
.. .. .. .. .. .. .. .. .. .. .. .. .. .. كافي من الدنيـا نشـوف العجايـب

ماني على من صد ضايق ومرتـاع
.. .. .. .. .. .. .. .. .. .. .. .. .. .. لا هو مـن الغاليـن وإلا القرايـب

لاصـار مابينـي ولا بينـه نـزاع
.. .. .. .. .. .. .. .. .. .. .. .. .. .. ولاجيتـه بزلـة ولا علـم خايـب

حق الرفيق أنـي نهيتـه ولا طـاع
.. .. .. .. .. .. .. .. .. .. .. .. .. .. والرأي مابه فـرض ولا غصايـب

يومه غدا بينت له كـل الأوضـاع
.. .. .. .. .. .. .. .. .. .. .. .. .. .. ماقلت أخلي سايب الوضـع سايـب

ناديت له لكـن تجاهلنـي وضـاع
.. .. .. .. .. .. .. .. .. .. .. .. .. .. صد وعلى عميـاه سـاق الركايـب

أقفى على رايـه ولافيـه مرجـاع
.. .. .. .. .. .. .. .. .. .. .. .. .. .. مثل السحاب اللـي قفتـه الهبايـب

للعلم بين النـاس مدخـل ومطـلاع
.. .. .. .. .. .. .. .. .. .. .. .. .. .. واللي يجود حامض العلـم صايـب

ومن ينطح المويه ولا عنده شـراع
.. .. .. .. .. .. .. .. .. .. .. .. .. .. إن عاش يرجع من هاك الموج هايب

والعاقل اللي لا خطأ يرجـع بسـاع
.. .. .. .. .. .. .. .. .. .. .. .. .. .. يسترجع ولا يأخـذ الـرآي عايـب

واللي يصير لرغبة النفس مطـواع
.. .. .. .. .. .. .. .. .. .. .. .. .. .. لابـد مايلقـى العنـا والمصايـب

والناس مختلفه لها أشكال وأطبـاع
.. .. .. .. .. .. .. .. .. .. .. .. .. .. بعض المعارف عرفهم لك نشايـب

بالناس من يلبس على وجـه قنـاع
.. .. .. .. .. .. .. .. .. .. .. .. .. .. حسود لكـن فـي ثيـاب الحبايـب

هذاك مانـي فـي مخـاواه طمـاع
.. .. .. .. .. .. .. .. .. .. .. .. .. .. من قبل أجيه وخاطري منه طايـب

والا الرجال اللي لهم بالوفـى بـاع
.. .. .. .. .. .. .. .. .. .. .. .. .. .. وقفاتهم تبـري الجـروح العطايـب

واللي لفاك بحـزة الضيـق فـزاع
.. .. .. .. .. .. .. .. .. .. .. .. .. .. مادار وجهه عـن سمـوم ولهايـب

ماصد يوم إنك من الوقـت ملتـاع
.. .. .. .. .. .. .. .. .. .. .. .. .. .. ماغاب يوم إن أكثر النـاس غايـب

هذاك نشري خوتـه كيـف تنبـاع
.. .. .. .. .. .. .. .. .. .. .. .. .. .. هذاك من شانـه تهـون الصعايـب

قلته وأنا مالي ورى هرجي أطمـاع
.. .. .. .. .. .. .. .. .. .. .. .. .. .. على أفراقـه لا تصيـر السبايـب

أسمع مادام الصوت ياصل للأسماع
.. .. .. .. .. .. .. .. .. .. .. .. .. .. إن تبـت وإلا عسـى منـت تايـب

مادامها صارت حـزازات وأتبـأع
.. .. .. .. .. .. .. .. .. .. .. .. .. .. مالـي ومـال مدوريـن الطلايـب

وأعرف تراها لوشكت ثقلك القـاع
.. .. .. .. .. .. .. .. .. .. .. .. .. .. مصيرها تركـز عليـك النصايـب

[ثابت الخطوه]

زى لون الطيف وألوان الفراش
.. .. .. .. .. .. .. .. .. .. .. .. .. .. الهنوف اللى شغلنى صدّها

إن بكت جا دمعها مثل الرشاش
.. .. .. .. .. .. .. .. .. .. .. .. .. .. وإن تبسّم ثغرها من قدّها

وإن حكت كن بشفايفها رعاش
.. .. .. .. .. .. .. .. .. .. .. .. .. .. الخجل عن سالفتها لدّها

والطيور اللى جفت حضن العشاش
.. .. .. .. .. .. .. .. .. .. .. .. .. .. ليتها خلّت بقايا ودّها

عقبها كل الغصون أمست نشاش
.. .. .. .. .. .. .. .. .. .. .. .. .. .. خاليه عقب الوناسه خدّها

كل قلبٍ فى ذراه الحب عاش
.. .. .. .. .. .. .. .. .. .. .. .. .. .. فيه طيبه زايده عن حدّها

والقلوب إن فارقت صارت هشاش
.. .. .. .. .. .. .. .. .. .. .. .. .. .. موحشه والذكريات تشدّها

رفرف البرق وزِمَت بيض الدشاش
.. .. .. .. .. .. .. .. .. .. .. .. .. .. وامتلا من صافى الما عِدّها

مابنيت بيوت شعرى من قشاش
.. .. .. .. .. .. .. .. .. .. .. .. .. .. ليه أخاف إن الرياح تهدّها

والهجوس اللى من الفرقا عطاش
.. .. .. .. .. .. .. .. .. .. .. .. .. .. ترقب نجوم السما وتعدّها

يوم شق النور من ليل القماش
.. .. .. .. .. .. .. .. .. .. .. .. .. .. شفت حبّة خالها فى خدّها

القصيد لمثلها وإلأّ بلاش
.. .. .. .. .. .. .. .. .. .. .. .. .. .. لو تبى عمرى حشى ماردّها

[ثابت الخطوه]

باب المشاركات مفتوح للجميع

[محمد الراشد]

ما اجمل هذا الشاعر
لو قرات لهذا الشاعر فقط لاستغنيت عن البقيه
ثابت الخطوه اختصرت علينا البحث عن الدرر
فكانك تقول
هذه الدرر واختاروا