|
القلم بيدي واصابع يميني تقلّبه
وصفحتي البيضا شكت لي حنين المفردات
من زمان بخاطري شي ودي أكتبه
والتردد حاصر احساسي من كل الجهات
ودي اكتب فيك ولكن أخاف الموهبه ..
تغرق فبحر الوصايف ولا ألقا نجاة
من عرفتك صرت اخاف الشعر واتجنبه
وكان لي بارض الشعر ناس وحراس وحياة
إعذريني واعذري خوفي من هالتجربه
دامك احلى احلى ماشفت ولا بعدك حلاة
تنوصف غيرك في كم بيت وانتي المكتبه
ماتوفي لك دواوينها ربع الصفات
لك وصايف لو تسمى .. تسمى المتعبه
الله ياهي ذيك الاوصاف سوت بي سواة
شاعرك في موقف للعدو مايرغبه
ان كتب قصر واذا ماكتب قالوا رداة
ماني كاتب شي .. وانتي ياعمري طيبه
وادري انك تبتعذريني من زود الغلاة
باكتفي في جمله وحده .. أحسها مناسبه
ماظهر مثلك على مر تاريخ البنات
|
