|
كنت أعتقد بأني قد خضت في كل مايتعلق بالحب ولكن .. للحب رأي آخر .. أو بالأصح .. زاوية أخرى
بالقلب ونة بعيد وعبرة مكنونه
وبالعين لهفه وحرقة شوق للغالي
يا ويل قلبي على واحد تعرفونه
ميت على شوفته وعيت تهيالي
توي عرفت الحسد واللي يحسونه
ولاني بحاسد على صحه ولا مالي
أحسد جميع الذي عنده ويشوفونه
وعزي لمن حاله متشابه مع حالي
له بالغلا قدر لا يمكن تقيسونه
لا به غلا قبل هذا ولا غلا تالي
عمره ثلاثه الا شي والكل يحبونه
ومالومكم فيه شوفوا دونه احوالي
زوله ونظرات عينه وصفت سنونه
تسوى مصر باللي فيها غرب واهالي
تكفون ياللي معه وياللي تزورونه
لاتحرمونه من اصغر شي للغالي
وان صار واخطا عليكم لاتزفونه
علموه بالصح دام ان الذكا عالي
تراه يفهم ويعرف اللي تقولونه
انا اللي جبته وانا ادرى الناس بعيالي
وادري انه يسأل علي ولاتلومونه
دايم في باله مثل ماهو على بالي
قولوله هانت وابوك الله في عونه
قولوله انه سبب حلي وترحالي
اتعب وتطري في بالي ضحكة عيونه
وتهون عندي همومي لو هي جبالي
وتكفون ياللي بتجوني لاتخلونه
برجع وابشوفه اول واحد قبالي
|
