|
صادقة لقلوبكم الطاهرة تفضلوها
ماعاد قلبك يبيني مثل ما اخبره
اشوف عندك وجودي يشبه غيابي
ماجيتك الا انا والجرح والعبره
عشان اقدم لقلبك باقي عتابي
اغليك.. لكن! بحكم (السن والخبره)
ماني بقايل غيابك ويش سوى بي
صبرت حتى خفوقي مل من صبره
واهملت نفسي عشانك بس ترضى بي
يعني عشان الظروف الماضيه غبره
بتاخذ بحق نفسك لو على حسابي
القلب لا ملّ طاح القلب من كبره
ولا انت قلبك عديم احساس ما تابي
تدور الايام واحزاني معك عِبره
ومحبتك ثوب شوّه صورة ثيابي
كسرت نفس(ن) لها عامين منجبره
والحين قبل نتفارق عانق اهدابي
ماجيت ادوّر لحبك داخلي دبره
جيت اتوسد جروحي لين تصحى بي
وان قدّر الله ابي هالقلب تعتبره
ميّت, وحاول تقّفل صفحة كتابي
مافيه داعي تقرب له وتختبره
يعني اذا رحت تبقى اخر احبابي
وان جيت عاني وقلبك مثل ماخبره
اباخذ بحق قلبي واقفل ابوابي
|
