|
يامل قلبً ظروف الوقت توميبه
اوماي صقار طيره بالهوى غادي
مع ربطته بالسبب من شأن تدريبه
انقص خيط السبب والطير ماعادي
مغير يركض وكل رجمٍ يعديبه
انبح صوته كثر مايصيح وينادي
على عشيرً شبكني في مقاظيبه
واكبر مصيبه يزيد الهجر بعنادي
عليه رمشنً كحيلً يوم يغضيبه
اروح في واديأ والناس في وادي
مدري علامي وانا صاحي واهذريبه
وليا بغيت اعذل الخفاق يزدادي
عذبني بالهوى والحب ندريبه
انه يخلي عزيز النفس ينقادي
القلب في وليتك لاتزيد تعذيبه
ارحم عزيز تذله يابن الاجوادي
مدري لو ان القدر يفتر ويجيبه
وأملك قليبه واسويبه على مرادي
والله مثل مايسويبي لسويبه
السن بالسن والظالم هو البادي
قلبً خذيته معاد اليوم تقفيبه
لو اذبح القلب في سكين ردادي
|
